Glenda

‘Res yw dhis omwolghi lemmyn, kyns mamm dhe dhos dre. Ena pur lan vydhydh rygdhi.” Res porres o gortos glan, dell brederas, rag gwitha y deylu yn tiogel dhiworth an benynes kuv a vynnens y weres. Res porres o na wodhyens yn kever tebel studh aga mamm. Res o dhodho gweres y hwoer lemmyn, hag y vamm owth omdhoen in fordh mar goynt...

‘Pur dha,’ yn-medh hi.

‘My a wra pareusi dha bhadh. Res yw dhis mos dhe stevell omwolghi, yn skav. Y fydh mamm tre yn skon.’

Ev a’s gasa ha mos dhe bareusi an badh ow koslowes rag klywes hy movyansow ha hi ow sevel yn lent. Ny re wrussa hi drehedhi pan veu parys an badh.

An vowes a wrug mos ganso dhe’n stevell omwolghi hag y hwrug hi y gummyas hy gorra yn stevell. An maw a dreylas a-dhesempis hag eth yn-mes. Res o dh’y hwoer omweres hebdho alemma – ny vynna mires orth hy horf noeth. Yn usadow, y kara hi hy badh, ha nyns esa kaletter dhe wul hy omwolghi yn ta lowr. Treweythyow hi a wre ow kana, hweg hy lev mes ankoth an kanow, gans aga heryow na yllys denvyth aga honvedhes. Martesen nyns esa styryow vydh dhedha.

Ena ev a’s gasas rag gorfenna y oberi y’n gegin.

Yth esa an new gwag wosa berr dermyn, meur y varth, hag ev a’n lenwis arta, ow klanhe spas war an moes hag ev orth y wul. Gwag o an new arta yn skon, ha pes da o an maw. Esya o ages ev dhe grysi. Lenwel an new arta a wrug parys rag an termyn nessa. Lemmyn, ogas glan o unn tu an voes. Ev a settyas an platyow glan warnedhi, parys rag an kinyow.

Ankevys re bia Glenda, hag ena, ev a woslowes rag hy hlywes, ow kana po ow movya y’n dowr. Kosel o an chi dien. Ev a wra mos a-bann an gradhow dhe daras an stevell omwolghi.

‘Glenda! Osta ena!’

Nyns esa gorthyp.

‘GLENDA!’

Taw.

Ev a gweskis an daras, ow karma, ‘GLENDA! GLENDA?

Taw hwath. Igeri an daras berr bellder a wrug, ha mires a-berth y’n stevell. Gwag o hi. Leun o an badh a dhowr ha glan ova hwath. Nyns esa dillas an vowes ena, nag an vowes hy honan. Degea an daras a wrug ev ha mos dh’y chambour. Gwag o. Gwag kekeffrys o an stevell bellwolok. Troblys ova lemmyn, hag ev a dhallethas hwilas der an chi. Byghan o an chi ma. Nyns esa lies le may hyllys omgudha denvydh. Ev a’n jevo own hag ev ow mires orth pub fenester oll, mes degys y fons. A hallsa hi mos yn-mes, hag ev y’n gegin? Martesen. Mes yn usadow, hag hi ow movyans der an chi, hi a wre gul meur a dros. Ha degys o an unn daras a hyllis hy devnytha rag mos yn-mes. Nammenowgh hi a wre degea darasow war hy lergh.

Ev eth y’n mes ha mires a-hys an stret. Ny veu an vowes ena. Ev a boenyas troha’g an mor, bys y’n welas ev an treth heb kelli gwel a’n ji. Nyns esa hi ena. Ny vedhas spena meur a dermyn yn-mes. Martesen hi a wre mos tre seulabrys. Ev a dhehweles tre ha mos a-ji.

Troblys dhe wir ova. Rag kudha y own dhiworth y honan, rag res o y gudha dhiworth an fleghes erell, ev a dhehwelas dhe’n gegin rag pesya hy lanhe. Ogas ha glan o hi kyns igerys veu an daras hag an dhew vowes a wrug mos a-ji. Bara ha amanenn a wrussons i prena, ha bakkon hag avalow. Yth esa lowr arghans gesys rag prena leth ynwedh. Pes da o an maw.

Ha pes da o an mowesi ow mires orth an gegin. ‘Pur dha osta, a Trevor,’ yn-medhons i. ‘Ni a wra golghi and leur ragos, an amariow kekeffrys.’

‘A wrussowgh kavoes Mamm?’

‘Na wrussyn.’

‘Po Glenda?’

‘Glenda?!’

‘Hi a wrug diank dhiworthiv ha my owth oberi y’n gegin.’

‘Diank?’

‘A wrussowgh hwi hy miras y’n stret?’

‘Na wrussyn.’

‘Wel, hi a dhehweles skon, dell waytya. Pub den oll a’s aswonn.’ Hag ev a dhallethas pareusi kinyel byghan rag an teylu.