Jenifer

Yeyn o an gwyns skav esa ow hwitha dres an mor; byw ha leun a hwystrennow ova. Treweythyow trist, ha treweythyow gwariek a heveli y levow, ha treweythyow yth esa amal tynn dhedha. An woelannes a wre oela y’n ebrenn, ha treylya yn kylghyow ledan yn fordh may hwrella enev Jenifer mynnes oela ynwedh. Rannow pilennek a gommol a wre resek der an ebrenn, nammenowgh yth esa gwelys an howl war aga lergh.

Pub dydh oll o kepar ha hemma. Yth esa pols berr (ha berr dhe wir ova, mes dhiworth gwel arall dibenn ova) pan esa hy a’y sav a-wartha an gradh a wre dhiyskynna dhe’n treth. War hy lergh yth esa an dre: gwerthjiow, hy chi, hy fleghes. Hy herens, kekeffrys, ha soedhvaow, hag y’ga mysk soedhva pleth esa hi owth oberi nans o nebes misyow. Y fia da gensi an soedh na – hweg o hy howethyasow ena, ha da lowr an arghans. Martesen y fia an soedh ma hwath orth hy gortos pan wrella hi tremenya dres an termyn trist ma.


War hy lergh hy herens... ha blam. Treweythyow hi a wrussa nammna treylya pan brederas hi yn kever aga huvder pan wrug hi kelli hy gour, ha’y fleghes aga thas. Esedha gensi a wrussens dres an nosow euthek pan wortas an teylu nowydhow a Bolyn, hag ev ow tos nevra. Ena, assaya a wrussons i hy lettya spena hy dydhyow war an treth owth mires orth an mor rag hwilas an kok hag ynni hy h.

Gokki o, yn sur. Marow o Bolin yn sur, ha’y goweth yowynk, Mighal y hanow. Yn tre bell a wre triga y deylu. Jenifer re wrussa metya orta unnweyth. Trist o bos kellys aga maw.
Gokki o, yn sur. Y tylis dhe Jenifer mos tre ha digamma hy bywnans. Edhomm anedhi yth esa dh’y fleghes. Hemm o lavarow hy hentrevogyon, hy howetha, hy herens. Gwra prederi yn kever Glenda. Edhomm ahanas yw dhedhi. An gevellesow. Edhomm ahanas yw dhedha. Trevor...

Ena, pup-prys, yth esa a-dherag dhe dhewlagas hy brysTrevor, kov y enep brav ow tehweles dhedhi, leun a fydhya y dhewlagas yowynk, kolonnekter y worhengeughyon ow kolowi ynna, kerensa ha skoedhyans rygdhi. Ev a wodhya moy es ev a wodhya ev dhe wodhvos.

Nag esa! Nyns esa an edhomm anedhi na dh’y fleghes. Aga edhomm, kepar ha’y edhomm hi, o a hy mos pub dydh oll dhe’n treth ha mires orth an mor, ha hwilas...

A’y sav ena, ha tybyansow y’n par ma ow tremena der hy brys, hi a wre mires orth hy dorn war an kledhrenn, ha’y thybyansow ow mos ha bos tybyansow bys arall, pell ha ankoth, tybyansow benyn arall, benyn nyns esa aswonnys dhedhi marnas mar eghenn a hunros a wre hwarvos dhedhi neb le arall, neb eur arall.

Drefenn, yn despit dhe pub tra oll, an gwir o yth esa galloes nerthek orth hy thenna dhe’n treth, ha nyns esa fordh dhedhi dh’y dhenagha. Ny wodhya hi fatell wodhya hi, mes wodhya hi yn ta nag esa hy gour marow. Klywes a wre yn maner sotel mes sur y vos yn fyw, hag y vos gensi yn spyrys ha’y ow kerdhes war an treth. Edhomm anedhi yth esa dhodho ev, edhomm gweres galloes hy holonn ha’y enev. Nyns o res dhedhi konvedhes hemma. Res o dhedhi bos ena, ow ri dhodho hy galloes oll.

Dhe'n savla-kyttrin

Ternos pan dhifunas an fleghes yth esa aga mamm gyllys seulabrys, mes gesys war an voes y’n gegin yth esa arghans lowr rag prena gwara gans listenn. Res o dhe’n bia re wrussa Trevor orth y bareusi an gorthugher kyns mos ha bos aga hansel. Lowena ha Tamsin a vynnas prena gwara ha da gans Trevor o henna. I a dhug an arghans ha gasa an chiow a-varr rag kerdhes dhe skol.

Trevor a wrug glanhe an gegin wosa an hansel. Pur dha o ganso bos pes da y vamm ev dh’y wul an dydh kyns, ha ny vynna y mos ha bos strolek arta. Martesen ev a gonvedhes wor’tiwedh y vos res dhodho omgemmeres negys oll an teylu. Ny yll y vamm y wul mann lemmyn. Gwir o hi dhe vos tennys dh’y goel trist war an treth gans nerth ny ylli hi settya ortho.

Glenda ny vynna marnas bara amanennys. Gwyskys bia gans an gevellesow, hag yth esa hi a’y esedh y’n esedhva ow mires orth an bellwolock pan eth hy breder dh’y gavoes rag hy doen dh’y savla-kyttrin. Pub myttin y hwre gortos an kyttrin gensi, ha’y gorra warnedho pan dheuth. Yth esa hy skol arbennik yn rann pell an dre.

An myttin na, dell usadow, yth esons studhyoryon y skol ev orth aga passya war aga fordh dhe skol. Dell usadow, ny miras Trevor orta, drefenn ev ny vynnes gweles aga mires orth y hwoer goynt. Nyns esons an fleghes na ow kewsel dhodho nammenowgh, mes an myttin na, flogh aswonnys yn ydhyl dhe Drevor, ow passya gans y vreder yowynka a wrug hedhi berr dermyn ha leverel, “A hi dha hwoer?”

“Yw,” yn-medh Trevor, parys rag y dhefendya.

“Penn-sogh yw,” yn-medh an maw yowynka.

Yth esa Glenda ow mires orth hy diwla, movyans hy dewlagas byw hag war amkan. Nyns esa an kyttrin ow tos hwath, soweth.
“Yw,” ev a worthybis.

“Trist yw henna,” a besyas an maw kottha. “Pur hwegh yw. Pur dheg hy enep.”

Ny watyas Trevor henna. Ev a dreylyas y benn wor’tiwedh rag mires orth an dhew vaw, mes ev re bassyas a-hys an stret, ha nyns esons i ow mires war aga lergh moy.

Movys yn koynt o Trevor. Gwir o, mes ny wrussa ev y gonvedhes yn ta kyns. Melyn hy gols hir (hi a wre oela yn serrys mar kwrella hy mamm assaya treghi hy blew), pur hwegh hy dewlagas glas, teg an furv vedhel hy enep. Hi re wrussa hirhe dres an vlydhen o passyes, ha moen ha jentyl o furv hy horf. Gwyr o y vos trist hy bos penn-sowgh.

Ev a assayas prederi yn kever fatell via bywnans y deylu mar kwrella Glenda konnyk, kemmyn, kepar ha pub den arall y’n teylu. Glenda, ow mos dhe’n keth skol ages ev! Glenda, ha kerens dhedhi! Glenda, ow mos yn-mes hag a-ji hy honan, heb gweres hy vreder po hy mamm. Trist o hy bos pennsowgh. O, dhe wir.

Ha lemmyn yth esa y vamm ow mos ha bos kepar ha Glenda, hy horf y’n bys ma, hy brys owth aswonn saw hwarvedhyansow bys arall...

An kyttrin a dheuth ha’y hwrug Trevor gorra y hwoer ynni ha mos dh’y skol ev yn skaff.