y'n gegin

slynkya yn-mes a’ga hadoryow an gevellesow a wrons, mes sygera ow kasa an gegin, ha hedhi orth an daras. trevor re wrussa mos a-berth y’n stevell ow kewsel hwath. “mar kwrylli krysi henna, prag y hwreta mos pub dydh oll dhe’n treth, ha mires orth an mor? ty a wayt y dhehweles tre, na wres?”

“res yw dhis leverel dhyn an gwirioneth,” yn-medh gras. “dha deylu on ni. agan mamm os ta.”

“wel, ny vynnav ri dhis gwaytya falslych...” a dhallethas hi. “martesan venyn pur gokki ov vy, mes y hwonn dhe wir yn fyw yw agas tas. brys ow horf a woer bos ewn lavar gwythyades kres, mes brys ow enev...” hi a hedhas berrdermyn owth anella yn town. ena hi a besyas, “my a’n klywes... treweythyow... hwath... my a’n klywes...”

yth esa an mowesi ow tos arta y’n gegin, ha’ga mamm ow mires orth an voes, heb drehevel hy fenn. yth esa taw, saw tros bellwolok glenda dres an fos. trevor a wovynn, “pandr’a a wra ev leverel?” gwynn o y enep, ha ownek.

“ogh, ny lever travydh, po ny allav klywes y eryow...”

“a wreta y weles?” a wovynnas sara.

hy mamm a viras orth an fos, gwag hy enep, kepar ha enep glenda ha hi dhe ves yn hy bys arall. ena hy a leveris, “my a wel y enep... yn fenowgh... y dewlagas ow mires orthiv. mes na wrav... my ny’n wel... my a’n aswonn gans skiansow erell... ev a wra ow gelwel, heb lev, heb tros vyth mann, ha ny allav sevel orth y elwel. ny allav omlettya krysi y vos ev, yn fyw... res yw dhymm mos dhe’n treth rag goslowes ha mires ragdho... yma edhomm dhodho ahanav.”

“ple ma ev?” a wovynnas gras.

“ny wonn mann... ny hyllir y vos le vydh. ny hyllir y vos war an mor hwath. mes ny grysav y vos war dir. tro-ha’n gorwel my a vires pub eur oll. y hwonn ev dhe vos ena... mes, i a’gan hwilas war bub ynys...”

wosa berrdermyn gras a leveris, “martesan beudhys yw, ha ty ow klywes y darosvann.”

“yn fyw yw dha das, sur ov vy!” a garmas hy mamm, serrys hy lev distowgh, ha’n vowes vyghan a dreylyas dhe’n fos ha dalleth dhe oela. Dres nebes mynysennow yth esa trosyow hy oela ow leunhe an stevell, kepar dell wre an stevell hy honan oela gans galar pur dhown hag i a biwas oll an galar na.

ena an vamm a leveris, “drog yw genev, gras, hwegenn. deus omma.” an vowes eth hag esedha yn kador glenda, ha poesa war hy mamm, kepar ha glenda, bregh hy mamm a-dro dh’y diwskoedh.