kellys an voves

heb mar, dell wodhya yn ta, nyns esa travydh dhe weles marnas fos chi nessa. yth esa aswa pur vyghan ynter an chi ma ha’n chi nowydh nessa, hag y hwelas warnans. nyns esa spas lowr saw rag logosenn dhe dremena dres.

pan ova yowynka, y hwre trevor gasa dhe goedha traow byghan warnans ena rag klywes tros aga hoedha. termyn hir re bassyas a-dhia ena, mes y hwre perthi kov a neppyth ankoth yn y gever. pub eur oll ev a’n jevo own hag ev ow korra y benn dres an doras ma ha tochya fos an chi arall rag gweles an tra ow koedha. yeyn ha sygh o an ayr ynter an chiow hag ankoth y blas. nyns esa an own ma a goetha y honan – yth esa neppyth arall... troblys ova.

mes nyns esa an termyn dhodho dhe brederi yn kever traow yn par na lemmyn. pleth esa y hwoer? ev a dreylas hag eth dhe-dre dhe’n chambouryow rag pesya hy hwilas. nyns esa hi ena.
mes wor’tiwedh ev a glywas levow an gevellesow hag i ow tos a-ji. ev a elwis a-dhesempis, ‘ay, ple ma glenda? a’s gwelsowgh hwi yw hi yn-mes?’

‘ny wonn. ny kellys arta?’

ev a dhiyskynnas an gradhow. ‘ny allav hy havoes. yth esa hi yn stevell omwolghi...’

‘hi a wra dehweles. pub eur oll y hwra hi.’

‘eus kinyow? nownek ov vy!’

mes troblys o an bagas byghan hag ev ow taleth kinyewel.

wosa berrdermyn, aga mamm a wrug dos a-ji, rudh hy enep wosa hy jydh yn-dann an howl toemm, ha’y blew strolys gans an gwyns. trevor a sevis a-dhesempis rag gorra boes war blat rygdhi, mes hi eth yn-bann kyns, heb leverel marnas ger uskis a dhynnargh ha hi ow passya an gegin, hag an fleghes a’s glywas a-ugh ow mos kyns dh’y chambour hag ena dhe’n stevell omwolghi. ena i a glywas hy lev ow kewsel. taw berr a sywyas hag arta lev aga mamm. dhe biw a wre hi ow kewsel?

trevor eth dhe’n gradhow rag goslowes yn tinn. ev a glywas lev y vamm ow leverel travydh, martesen govynn. ha gorthyp a glywas ev kekeffrys, yn lev kosel y hwoer. glenda! mes... fatell...?

ow trehedha orth penn an gradhow, trevor a viras, meur y varth, orth y vamm ha hi ow synsi igor daras an stevell omwolghi, ha glenda ow tos yn-mes, hy blew ha’y horf hwath glyb lowr yn-dann hy dillas.

‘prag ny wrussysta gortos rag glenda kyns kinyewel?’ a wovynnas y vamm. ‘hi yw dha hwoer.’